2017年8月18日
1. 我哋其實冇乜資格亂講,佢哋嘅父母先最有資格發言。我留意到冇任何父母怪責佢哋出嚟搞事,反而公開話以佢哋為榮,他們並非為一己私利。你都啱,可能怪責子女搞事嘅父母只會暗中責怪佢哋搞到要坐監,而唔會公開走出嚟講,踩多一腳,但從未見過有犯事坐監的人,佢哋父母會讚犯事正確。父母都支持嘅犯罪行為,相信壞極有限。犯罪行為都有正確,都有唔壞?
1955年嘅美國,Rosa Parks坐巴士唔讓座畀白人都係犯罪,要拉。而家唔會有人話佢犯法唔啱,只會稱佢為黑人平權先鋒。可見今日犯法坐監,或者他朝人神共仰,正確與否同是否違法,兩者不可畫上等號。年輕人向自己交代,向父母交代,影響到社會接受咗懲罰。其他人如果加把嘴說活該,是契弟,是賤人。
2. 曼德拉坐咗27年監,昂山素姬被軟禁20年,甘地出入監倉十數次。咁樣講好似好涼薄,但係平民百姓要改變社會現狀,最有力嘅非暴力武器,其實係坐監。當然,齋坐監係冇用,首先你代表嘅理念要夠多人認同,你坐監會令追隨者心痛,坐監嘅時候理念沒有煙消雲散,集齊呢啲條件,坐監先可以變為武器,否則未放監已被人遺忘,談不上什麼武器(噢,我寫了多次武器,這篇文章太暴力了)。
不過,以上都只係必要條件,未係充足條件。坐監要足以改變社會,其實必須要當權者肯改變,否則你坐一世,坐到死都冇用。曼德拉同昂山素姬都係政府放你出嚟,先有機會從監犯變成國家領導人。如果當權者唔想改變,佢哋惟有繼續非暴力下去,歷史可能改為曼德拉坐監37年。坐監,無奈啲講句,其實係等當權者開竅,良心大發,容許社會改變。當然,透過坐監凝聚社會求變力量,或者可以加速當權者非變不可,但最後成功與否,好不幸,唔係坐監嘅人有主導權。
3. 前輩當年話如果23條成功立法,咁就收聲收筆返歸,為免唔知幾時返唔到屋企。當年中年人都有反抗嘅意志,但係而家只有年輕人還懂得什麼是反抗,中年人而家只懂得在社交媒體呻吟幾句,在自己人嘅WhatsApp群組互罵一番,第二朝又繼續搭港鐵返工,一星期後大家又冇事發生,只係心中繼續戚戚然。我戥年輕人唔低,佢哋反抗,代價由佢哋支付,好處由中年人收割,最後社會比佢哋反抗前更差。唔好怪責年輕人反抗,只怪我哋年輕時冇認真地反抗。
訂戶登入
下一篇: | 場波有排搓 |
上一篇: | 「滬港通」及「深港通」上日收市統計 |