熱門:

2017年6月24日

畢老林 投資者日記

長命債唔一定長命還

6月23日,周五。常言道,有借有還上等人。如果一個近200年來八度債務違約的國家向閣下伸手,你會第一時間走夾唔唞,抑或視乎借貸條款而定,睇下點?

閣下怎想老畢唔知,但這個違約當食生菜的國家(八度違約有五次發生於過去100年,當中三次出現於過去23年!),本周重返國際市場發售債券,年期長達100年,目標集資額27.5億美元,居然吸引了97.5億美元資金認購,超額高達2.5倍。

駁長條命

大家想必知道,老畢講嘅係阿根廷。這批債券將於2117年到期,名副其實長命債長命還。撇開一世紀流流長什麼事也可發生,即使今天才出世,能活過百歲者恐怕亦少之又少。以債券買家的年齡,當中有多少人一世紀後依然奇蹟地健在?好話唔好聽,與其「駁長條命」等阿根廷政府信守承諾,於2117年足額贖回債券,倒不如反其道而行,打賭這個國家幾時再次賴債。睇怕不用等上百年,三五七年話唔定就有錢收。

買得阿根廷債券,斷估唔係老散。機構大戶出名數口精,算盤打不響焉會隨便落注?一個舉世聞名的違約大國發行無人有命揸到夠鐘的債券,竟有那麼多人爭崩頭買,此情此景,發債方自然笑到合不攏嘴,但投資者又為乜?老畢好奇心起,當正自己係大戶,思考阿根廷債券買家條數點計。

先睇回報率(孳息)。阿根廷百年債券息票率(coupon rate)7.125厘,按面值100打個九折定價,這項固定收益投資的一年回報略低於8%(7.125 / 90 = 0.079)。債券以美元定價,假設投資者本幣為美元或港元,理論上沒有滙兌風險。然而,對發債方阿根廷來說,披索兌美元一旦貶值,還款付息成本便會加重,對債價和孳息可能構成影響。那並非本文討論重點,知道便行,不必深究。

着眼賺價

孳息8厘能否抵消「賴債天王」再度違約風險,老畢唔係專家,自然答不上口。計死數嘅話,一年回報率8%,12年投資便差不多回本。可是,莫講話阿根廷,「穩陣」如大不列顛,以為提前大選sure win都可以賴嘢賴到唔知點收科,12年喎,阿根廷可以舉行幾多次大選、政策可以U-turn多少回,閱歷深厚的國際大戶唔會唔打埋落投資條數。一年8%、12年上岸,睇怕唔係大戶杯茶。

既然如此,阿根廷債券點解仲咁搶手?在下相信,該國本周發行的債券號稱百年,惟買家目光所及不會超過兩年。阿國政壇剛經歷改朝換代,民粹派下台,投資者寄望政局趨穩經濟改善通脹受控,倘若一切沿此路進,阿根廷債價可望上升, 帶動孳息回落至與其他拉美大國看齊的水平,現在購入,潛在資本增值隨時達到雙位數。

甩唔到身

有息收有錢賺兼有人爭住接貨,邊個咁神心同你風雨同路一世紀?問題是,個個都諗住阿根廷touch wood出事,自己總能較別人快一步「撇」,到頭來可能齊齊變大閘蟹甩唔到身。百年太長,十年夠你捱未,歷史不已把教訓寫在牆上?

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads