熱門:

2017年6月19日

高仁 財圈識真假

現金去哪兒

上文提要:沽空機構葛咸城研究(Gotham City Research)化身「蝙蝠俠」首度狙擊本港上市公司之後,另一沽空機構匿名分析(Anonymous Analytics)卻自願擔當「匿名超人」的角色,替被狙擊的上市公司打抱不平進行反擊。

繼「匿名超人」反擊「蝙蝠俠」之後,沽空機構的「始祖」渾水研究(Muddy Waters Research)又向另一家上市公司發動攻勢,除了一貫狙擊調查公司的「套路」之外,其中還涉及懷疑掩飾現金流向。本文,高仁與「豬朋狗友」將為各位「巴打」拆解如何對現金做手腳。  

在披露對話實錄之前,請各位「巴打」與「絲打」重溫人物背景,簡介如下:

程更計──本地證券行經紀兼財務顧問,除了招呼散戶之外,亦向上市公司出謀獻計;

施友化──擁有公司私有化經驗的前「唉賓」,為人醒目,被看中轉型為上市公司CFO。

谷大應收賬增存貨

程更計: 近期,港股真係夠晒精采,沽空機構空群而出,「匿名超人」反擊「蝙蝠俠」之後,再有「始祖」渾水落場,被懷疑造假嘅上市公司都人人自危。

高 仁: 除咗一貫狙擊調查公司嘅「套路」之外,今次較特別嘅係當中涉及懷疑掩飾現金流向嘅指控,呢一招其他沽空機構係比較少用。

施友化: 冇錯!渾水嘅質疑就係,公司實際盈利同free cashflow(簡稱FCF,自由現金流)可能較對外披露嘅數據為少,懷疑其透過隱藏借款偽造現金餘額蒙騙核數師以及用於支付股息。

程更計: 公司谷大sales同profit造假就時不時都聽到,公司喺現金方面「做手腳」就真係比較少見喎!借用內地《爸爸去哪兒》嘅節目名,我想問「現金去哪兒」呢?

高 仁: 阿程,你求其攞一間公司嘅cashflow statement(現金流量表)嚟睇下,第一個item係除稅前溢利,之後就有N咁多項調整,最尾得出bank balance(銀行結餘)年終現金及現金等價物粒數【表】。渾水講到盈利同free cashflow嘅差別就停咗,其實佢嘅model唔算完整囉。

施友化: 高仁講得啱!如果公司造假數,表面上會谷大咗除稅前溢利,惟實際上唔會有咁多cash inflow(現金流入),最起碼可從4大層面「使走」部分現金,包括A.R.(Accounts Receivable,應收賬)、存貨、收購同銀行賬目。

高 仁: 第一層嘅A.R.,一方面公司賣產品畀「友好」谷大sales,「友好」又拖延唔找數住,A.R.
增加;另一方面公司透過「友好」繳付購買原材料嘅款項,避免應收賬太高。總而言之,要降低現金流。

程更計: 我記得嘞!嘉漢林業(Sino-Forest)就係用呢個「授權中介人」(authorized intermediaries,簡稱AI)嘅方法谷大sales,被渾水成功狙擊到清盤(詳見2011年6月〈「渾水」睇真啲──拆解嘉漢AI之謎〉文章)。

高 仁: 不過,呢個方法零售業比較難運用,因為佢哋都係現兜兜收cash,同業通常都比較少有A.R.,如果公司與別不同就會好礙眼,好容易惹嚟核數師懷疑。

施友化: 高仁講得冇錯。所以,第二層嘅存貨,批發或零售業一樣適用,公司可聲稱本身存貨水平增加,令啲cash被砸住。當然,公司做戲要做全套啦,核數師肯信先過到「骨」。

程更計: 你哋都講到口乾,不如飲啖茶、食個包,之後再講埋第三、四層嘅收購同銀行賬目,可以點樣「洗走」啲cash。

(之一.飯局未完,下周待續)

本欄逢周一刊出

歡迎交流上市公司的財技個案及招數,請電郵至 [email protected]

 

(編者按:高仁著作《高仁財技--投資自由行》現已發售)

歡迎訂購:實體書

 

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads