|
熱門:

2017年4月12日

麥狄文 金融街密語

金融界展開AI革命

今時今日乜嘢都講求電腦化,講緊Fintech革命,金融業需要電子化,甚至唔少外資大行已開始利用人工智能AI同埋機器學習系統分析文件,執行日常工作,裁減其他部門人手係冇錯,但點計條數,IT專才都應該更得到重用,唔應該成為食無情雞人選。

電腦取代人手是大趨勢

好似貴為全球四大金融機構之一嘅細摩JP Morgan,一直係花旗銀行業最大僱主之一,喺舊年中開始啟用名為「COIN」(Contract Intelligence,「智慧合同」)嘅AI計劃,代替人手完成公司日常工作,唔單止大大提高工作效率,更減低錯誤率。過往,細摩嘅律師同埋信貸職員,單係喺審閱商業貸款協議,又或者其他審批工作上,每年需要花上36萬小時;但係利用COIN呢個機器學習系統,唔使幾秒鐘時間就可以準確地完成工作,不僅能夠協助公司降低貸款業務的出錯數量,更為公司喺批發合同時節省大量資金。

當然要開發一個咁成功嘅AI系統唔係一朝一夕嘅事,細摩喺科技同市場上投入大量資金,研發呢個由細摩私有雲端網絡支持嘅自動化系統,COIN只係計劃嘅其中一部分,細摩將促使更多繁瑣業務達成自動化,為銀行及客戶開發更多新工具。預計未來幾十年,AI自動化程度將會更上一層樓,更有研究預言,目前57%工作將會由AI代替。

除咗後勤工作以AI系統代替人手之外,愈嚟愈多基金公司大量採用程式交易(program trade)進行投資,甚至利用演算法交易(Algorithmic Trading),完全唔經過交易員手,由電腦執行買賣任務,唔怪得以前喺裁員潮免疫嘅trader,家陣都話怕成為被開刀對象。

就連最近久休復出嘅「輪王」翁世權,都話過檔新公司之後,將改變過往策略,唔會再重用「人」去sell衍生工具,而係側重用「腦」嚟sell喎。過往輪王發掘咗幾朶新聞之花成為一代輪后,今次工作嘅Vontobel係歐洲出名做結構產品嘅金融機構,而最出名之處就係單字一個快,而快嘅原因係公司採用大量電腦程式,進行高頻交易。

以電腦取代人手係未來大趨勢,雖然電腦系統未必可以完全代替人手,但人工智能AI必定會喺不久將來大大影響目前嘅工作模式。

麥狄文(徐狄怡,證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。