熱門:

2018年9月22日

畢老林 投資者日記

壞鬧鐘一日響兩次

9月21日,周五。恒指自月中低位反彈逾千五點,不久前仍要勞煩金管局頻密出手干預的港滙,午後失驚無神升穿7.8,創15年來最大單日漲幅;連個天都好似有心幫忙,美滙指數在聯儲局下周加息無懸念下反而轉弱,新興市場久旱逢甘露,愈窮愈見鬼壓力得以暫時紓緩。

市場如人生,山窮水盡疑無路,柳暗花明又一村,衰時一齊衰,好時一齊好。李克強總理撐人仔收一箭三鵰之效、貿易戰中美雙方留手冇去盡,股滙跌到殘的反彈藉口而已。Fit a story into the price唔難,克服恐懼、在黎明前最黑暗一刻「做嘢」才難。

美股始終咁硬淨,新興市場風高浪急佢頂得住,外圍反彈佢一樣冇走樣,道指且破埋1月高位創紀錄。在華爾街這一輪升勢中,以道指表現最強,舊經濟股年初以來回報與新經濟股逐步拉近,當中可能反映緊某啲嘢。2018年快要埋尾,此一趨勢值得多加注意。有趣的是,個個禮拜唱淡美股者大不乏人,但你有你咒,佢有佢升,久而久之,此輩似十足壞了的鬧鐘,每天總要響兩次。

最近同一班玩開美股的朋友吹水,其中一位很有意思,逢識得嘅人都發電郵,告知大家哪5隻美股於史上最長牛市中表現最佳。

第二類廢話

若說壞了的鬧鐘日響兩回,你唔煩我都戥你辛苦,那麼股友的做法則令老畢想到另一個形同廢話旳比喻:假如閣下10年前在X、Y、Z股身上押下一萬元,今天你就是百萬富翁了;重手些投資10萬,今天即變千萬財主……股友咁神心,無非想向全世界傳達這個訊息而已。周末當前,不妨輕鬆輕鬆,就地取材駁吓股友。

第一,美國上市公司數以千計,知道過去10年邊5隻股份升得最勁,不代表你有本事選中任何一隻。點解你唔講5年前投資一萬元買通用電氣(GE),今時今日剩番六千幾?老套都要講句,有早知還有乞兒嗎?

第二,老畢孤陋寡聞,股友傳來的5家公司全皆聞所未聞,惟單論5股自2009年3月9日華爾街見底以來的回報,確實跑贏大市十條街。有幾巴閉?由一至五數起,分別為Patrick Industries(39800%)、Jazz Pharmaceuticals(28600%)、MGP Ingredients(17500%)、Sleep Number(14800%),以及GTT Communications(13900%)。換句話說,最「失禮」嗰隻回報也過百倍!

老畢講過N咁多次,投資最衰係只有backtest沒有front-test。股友當真揸足九年半,老畢豈止要恭喜賢兄,唔屈佢請High Tea請足一年都對唔住自己。好吧,就同你玩吓backtest。在下敢寫包單,看完結果後大家便心裏有數,百倍回報得個睇字!

2009年3月9日至今,依上述次序排列的5股,自高位回落最大幅度(maximum drawdown)分別為64%、50%、74%、58%及51%。

發夢中六合彩

這個並非最重要,仲有更大鑊嘅。那就是,若以金融海嘯前的美股歷史高位(2007年10月)為準,5股最大回落幅度分別為98%、97%、95%、99%及81%!

簡而言之,10年前市場當正這幾家公司隨時摺埋,大難不死必有後福好正常,惟百多倍甚至數百倍回報,當發夢中六合彩諗吓無妨,一旦知道揸足全程要捱多少風浪,以為呢個世界真係有人可以靠持有這些股票發達,too naive了吧?

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads