2017年2月28日
奧斯卡最佳電影其實冇乜指導作用,近年都係啲又悶又唔好睇、又唔覺有乜藝術成就嘅道德高地之作。Moonlight悶到爆,故仔簡單,又冇乜深層意義。不過佢係小本製作,黑人擔正,講單親家庭、吸毒、同性戀,成長過程對於美國呢啲物質過度豐盛但心靈空虛嘅國家,呢類電影直情係寫實紀錄片,就好似薯片最新嘅宣傳片一樣咁貼地。奧斯卡不嬲都唔鍾意俾人覺得佢大路,總係會頒個大獎畀啲偏門嘢,顯示自己清高。千祈唔好諗住買飛入場欣賞吓最佳電影,怕你會割凳。
又有隻創業板上市玩完,今次唔等你上咗半日,費事你夜晚訂咗間酒店慶功,唔知仲去好唔去好,上市前已經唔批准你。排緊隊成百隻創業板上市,錢就使咗,都唔知自己有邊處唔合規格、能否上市。自由經濟全靠有套清楚規矩令所有人都可以跟隨,然後各施智慧喺容許範圍內搵錢。
近幾年規矩開始唔係白紙黑字,唔容許嘅範圍亦愈嚟愈多。自由經濟變成計劃經濟,少數嘅意志可以即時無聲無息改變生態環境,正如薯片喺佢條宣傳片所講,建立番個有規有矩嘅制度,等大家避免浪費時間金錢。
香港樓價升到連地產專家都要轉軚,話唔再睇跌,要睇升,即係全城冇人夠膽再講一句樓價跌。樓價升得最勁嘅係細價樓,唔單止係因為基數細,升幅容易倍倍聲。更重要係,細價樓係羊群可以負擔嘅價位選擇。超級豪宅同細價樓嘅買家,買樓都係唔睇價錢。超級豪宅件件都唔同,冇乜價錢標準,等於創業板股份,似乎沒有公開市場,貨疏至極,一兩次買賣就可以踢起市價;細價樓貨多,但入市嘅散戶更多,全部害怕執輸行頭,恍似創業板股份升咗5倍,股價愈升愈有,散戶擔心冇份發達,一於撲入市高追,愈貴愈買。反而中價樓,用家主導,買家多為專業人士,銀紙唔多,理智行事。中價樓未有大升,反映仲有一撮人還未發癲,但睇吓可以守得幾耐,遲早連專業人士都沖昏頭腦,咁就完美地大家等樓市到頂。
訂戶登入
下一篇: | 患難見真情 |
上一篇: | 「滬港通」及「深港通」上日收市統計 |